आज पुणे शहर कोरोनाच्या दुसऱ्या लाटेला कठोरपणे सामोरे जात आहे. अनेक लोकांनी आपले प्रियजन गमावले आहेत. महानगरपालिकेचे कर्मचारी या मृतांच्या अंत्यसंस्काराचे काम करत आहेत. या कामात ‘स्व'-रूपवर्धिनी, ‘सेवा सहयोग’, आणि ‘सुराज्य सर्वांगीण विकास प्रकल्प’ या स्वयंसेवी संस्थांचे चाळीसहून अधिक कार्यकर्ते ससून रुग्णालयाच्या मयत पास केंद्रात आणि वैकुंठ स्मशानभूमीत अखंड सेवा देत आहेत. मी स्वतः भेट दिली तेव्हा मला त्यांच्या शिस्तबद्ध कामाची कल्पना आली. मयत पास केंद्रात २४ तास युवक-युवती उपलब्ध असतात, त्यामुळे पास लवकर मिळतात. स्मशानभूमीत सरण रचणे, चिता लावणे, अस्थी गोळा करणे, आणि दुःखी नातेवाईकांसाठी पाणी व बसण्याची व्यवस्था करणे, अशी अनेक चांगली कामे ही संस्था करत आहे. ‘स्व-रूपवर्धिनी’चे युवक बेवारस मृतदेहांचे दहन आणि संपूर्ण कुटुंब पॉझिटिव्ह असल्यास अग्नी देणे, अशी कामेदेखील मनोभावे करत आहेत. ‘स्व-रूपवर्धिनी’चे कार्यवाह श्री. विश्वास कुलकर्णी यांनी सांगितले की, आम्ही या कठीण काळात सर्व प्रकारे तुमच्यासोबत आहोत. मला यावेळी ‘स्व-रूपवर्धिनी’चे भूतपूर्व कार्यवाह स्व. ज्ञानेश पुरंदरे (ज्ञापु) यांची आठवण आली. ‘आम्ही सारे ज्ञापु’ या भावनेने सारे कार्यकर्ते काम करत आहेत, हीच ज्ञापुंना दिलेली योग्य श्रद्धांजली आहे.